Зубовополянские очерки : ветеран войны Баранов А.И. > Зубова Поляна (Мордовия)

Сюконятама тейнть, родинань аралайхть

 

Сиредсть фронтовикне, сиредсть, ванан :

Лешаф прясна — сенчтади сият.

Мархтост кит ульсть нинге меля, мана -

Тяни ётксост, няйсак, аш ни сят...
 

Сиредсть фронтовикне, сиредсть, аля,

Рядсна ломань ёткса кири свал.

Мезевок аф вешвндихть синь, марясть,

Мушендода теест лямбе вал.

Каркс эземге сюконятама войнань сембе ветераттненди. Максоза теенть Шкайсь шумбраши ламоняс эрямс масторлангса.

Мзярдовок аф нардави народоньконь мялямста сятнень лемсна, кит аралазь мастороньконь фашисттнень эзда, кит исть мрда вишке бойда меле, кит войнань кизотнень тиендезь стакадонга стака тефнень ошева и велева. Сембонди тейст — скжпря и инь пара арьсематнень.

1941-1945 кизонь войнась аф стак лемтьфоль Великай Отечественнайкс. Упема, мзярдонга аф юкстави, кодама питнеса сатовсь Сяськомась. А сембода пяк сятненди, кит эряфонь апак ужяльтть тюрсть инксонза. И мзяра ба киза афоль ёта, шиса лятф фронтовикнень мялямса ванфтовсь ся, мезсь тнярс апак няфтть аф киноса, аф книгаса. Войнать колга лятфнематне тячемс кодавок аф нардавихть ся ломанть мялямстовок, конань колга ёран азондомс.

Войнань пяк стака кит-ятт савсь ётамс Алексей Иванович Барановонди, Зубово-Полянскяй райононь Тархан-Потьма велень солдатти.

Алексей Иванович тусь фронту, мзярда тейнза ань-цектоподсь кемгафксува киза. Савсь ялга молемс мянь комсь кафтува вайгяльбе, штоба повомс военкомату эсь пингозонза. Но фронту повсь аф эзкак, а васенда тонафтсть эсонза зенитчиконь тевти. Пяк стакаль тя пингсь, ярхцамс ашель мезьда. Вачачшить эзда пельсть куломать коряска сяда, пади, и вачашись нинге кенордафтсь од ломаттнень сяда курок фронту повомаснонды. Арьсесть, што тоса ули сяда тёждя. Но улендсь аф весть станя, што ашель ков путомс ярхамбяль мархта котелоконяснонга, кругом — бомбаса сязентьф–нозонтф ломатть.

Алексей Иванович войнань кизотнень ётась лама тёжятть вайгяльбе. Ётазень кифтома вастова, рдазга и ловга, вирьге и тяри шяйге. Войнаса тейст сашендовсь пцтай суткань — сутка улендемс пильге лангса. Солдаттне пульзяйхть, лядыхть аньцек шотсна, прясна, бта синтьф шинжарома прят, алу нолдафт. Кда ни бойнь аделамда меле омбоцеть ушедомс удалсесь тейст аф ламняс анцек ваймамс.

Да вачашивок сашендовсь кирдемс, койкоста шикафта афольхть усксе ярхцамбяль, но солдаттне сявф рубежснон ашезь кадонда. А коста ярхцайхть пси лямда-ямда, ванат, эреклайхть и тяниёк анокт врьгятемс бойс.

А мзярксть Алексей Ивановичень ваксе шавондовсть ялганза, афи мяляфтовихть ни. А вов сонцень Шкайсь ванфтозе.

Фашисттнень каршес тюрсь 2-й Белорусскяй фронтть эса. Аф весть ульсь стака бойса, содазе мезе стамсь пушкань дуборфсь, снярядонь бомбань сязендемась, осколкань и пулянь вяшкомась. Повондсь окруженияека.

Победань шить васьфтезе Алексей Иванович Кениксберг ошеа. Мзяра ульсь кенярдемада, павазу сельмоведьта !

Рьванц, Екатерина Фёдоровнань мархта касфтсть вете цёрат и фкя стирь, оцюфт ни уноконза, улихть и правнуконза. 30 мартста теенза — кафксогемонь. Мялезе арьсемс теенза кеме шумбраши, паваз, каткэряфсонза васьфти нинге аф фкя валда оцю ила.

Н. Баранова

   Районная газета "Время и жизнь", 2005 г.

На первую страницу

На страницу Из века в век