Эряфонь вайгяльбет > Зубова Поляна (Мордовия)

«Эряфонь вайгяльбет»

 

Нина Алексеевна Шичкина.
 
Фото из газеты.

Ули Зубово-Полянскяй районца мокшень веле, лемоц Жуку. Ломаттне, кода ломатть, кажнайть сонцень эряфоц, сонцень историяц, кажнайть эряфса улендихть шит и мянь кизот, конат мзяр-донга аф юкставихть. Нина Алексеевна Шичкинась войнань и войнада мельдень стака кизот-нень ульсь трактористкакс.

Мзярда ушедсь Великой Отечественнай войнась, Нина Алексеевна Шичкинати улье кемнилие киза. Семьясост ульсь сембода ззрайсь. Сондедонза башка ульсть нинге ниле дуганонза и фкя сазорняц, кона ульсь сембода емлась. Тядянцты Нинась ульсь сембода лездыкс и самай надияма вастокс. Аляц ульсь трактористокс, сяс Нина, мзярда ульсь хоть анцяй пингоняц, ласькондсь алянц тейс и кельгсесь тракторонц эса.

Эрь шиня тушендсть велеста алятне, цератне. Сембе сяда лама тев кадондсть лыдыхненди. Тюрьсть  ичкозе,  а  вайгялец  войнать марявсь эрь кудса.  Горясь оцю, а тефне тиендемат. Кар-масть  кучеема вирнь керома.  А алянь кяттне ашесть сатне.  Азсть латта  и  Нинанди. Но кодама

сон вирень керы,  вдь тейнза и  кеветие нинге аш.  Аляц ванць ванць лангозонза и корхтазевсь : «Вов мезе, стирняй. (А тя ульсь 1941 кизоня ноябрь ковста) Оцяду велеса ули МТС, тоса панжевсть трактористонь курсат. Кда мяльце улемс трактористкакс, мон мярьган, архт. Тячи оцю надиямась тинь лангозонт. Аф ичкозе ся шись, мзярда монга улян ичкозе эздонт».

А Нина Алексеевна, кулемок алянц валонзон, согласиндась тумс ня курсненди. Аф, аф стал-мотне сонь эвфтезь, конат ульсть вирь керома вастса, а тусь сяс, мес седиксваймокс кельгозе тя кшнинь «айгорть». А Оцяду велесь ульсь кемгафксува вайгяльбе вастса Жуку велеть эзда.

Аделамок курсонзон, колма ковоньберьф трактор тейнза ашель. И тага лездсь аляц, кона ульсь нинге кудса. Сон азозе, что Рузонь Лундан велеса ули кунара ни кашф трактор, сон шямоню, паморьф, лама мезе эсонза аф сатни. Кда пяк мяльце озамс петьк, а мон тейть лездан. Тянь колга мон ни корхтань МТСонь директорть мархта. Сон, конешна, аф верондай, што пешеви, но эряви тяряфтомс. «Ну, кода ?» «А мезе кода» ? Конешна, петьсаськ, аляй» пеедзь азозе Нина Алексеевна.

Кенярдемазенди ашель певок, лятфнесь Нина Алексеевна. И виде, мезе аньцек аф тият, кда нужась фатятанза кргада. Кода мон учсень ся шить эса, мзярда монць кярьмодян рычакненди, мзярда тя кшнинь марсь токасы вастонц. И сон токазе... Дуборфоц-калдорфоц, бта ламос-ламос удомда меле ергозьфтязь.

Мяляфтса, кода директорсь мярьгеь дивандазь: «Вов тя тев !» Сон венептезе тейне кяденц, а мон визделгодонь и монценнетнень кяшине фталон, синь вдь ульсть вельф кяшихть, рдазуфт, да нинге эздост вастова щудесь вер, пяк ни сидеста молотокса эрьхнемста токсевсть. Но тейне. ульсь пяк пара, монь лангозон ванцть алязе, ялгане, конат каясть сельме. А директорсь поладозе : «Тонць кочкайть-прдайть, тоньць и мархтонза трудендак».

А Нина Алексеевнась ульсь сембода однясь ялганзон ёткста, трактороцка ульсь аф стама, кодамот ульсть лиятнень. Сонь трактороц ушневсь пенгаса. Тя тракторсь нинге васенцетнень эзда.

А пингсь содазе сонценнеть. Нина Алексеевна изь эводе сталмотнень эзда, сон, арась цебярь азоркс «Чуда тракторти».

И тусь тя машинась якама паксятнень эзга. Сембода стакаль машинанть ушнемац. Мзярда кеподьсак пси велькхсонц, штоба пяшкодемс пенгаса, эздонда фалу опшактькшнесь пси качам сод и кулу мархта. Ламоксть ульсть крхтафт шяяренза и сель-мошурьхконза, пицефт сельмонза, сембе сякатя машинать сон кельгозе сембода пяк. Тунда, кизонда и сексенда сокай, види, инзай, а тялонда тага путсы ремонте. И тага сашендовсь эрь недяляня якамс Жукуста Оцяду, штоба петемс-паннемс, анокламс тундань тефнеди.

Мзярда Нина Алексеевна лятфни тянь колга, сон фалу аварди.

«Алязевок ни войнасоль, кудсонк нужа, вача. Тядязе пидипани мархтон фкя круглай кши, кона шоряф кодцезень модамарень шоварфкеста, максы пяле ведарка модамарь и фкя куцю сал. Тянь сембонь рявсь сотфнемс неделяньберьф. Мзяра начка, мзяра кельме, мзяра пелькс савсь няемс, ётнемок ня кемгафксува вайгяльбетнень кафкеа кизоста. Кафкса тялот пецек якань Оцяду АТСу, штоба кельгома машиназе тунда улель паксяса. Мзярдонга аф юкстаса лемон маркац ТТХТЗ. А ульсть ни эста ЧТЗтка.

Сась войнаста алязе, сон кафкеть ульсь ранендаф, шумбрашиц сязьфоль, но эстокиге, пингонь эф юмафнезь, кярмодсь колхознь тефненди. Путозь бригадиркс. Да, сон ульсь трудонь кельги, но и пяк строгай. Сон валоц сембонди тейнек ульсь законкс. Да и кода сонь аф кулхцон-домс, вдь миь няеськтей-нзовок ульсть стака, рананза муцясть эсонза», шумордазе корхтаманц и арьсезевсь.

Плугарец Нина Алексеевнань лама киза ульсь Игнатова Марфа Николаевна. Соные мирдец ульсь стакаста ранендаф. Эрявсь мельганза якамс, пингстонза симдемс-андомс. Аф мяль вельде, но савсь кадомс плугарень тевонц. Сон нльне кизефтезе : «А кода тяни тон, Нина, моньфтомон ?» А Нина Алексеевна отчечась:

«Архт, Марфакай, тонь лезкеце тячи сяда эряви мирдценди, а тоньфтомот ламос аф кирди». Ужяль ульсь явомс мархтонза, но мезе тият. Марфа ульсь сяда сире, но синь кяльсна-валена фалу шоворкшнесть, шарьхкодсть фкя-фкянь, явокшнезь ярхцамбяльснон, синь и аварьакшнесть и морсекшнесть марса, и аф авань тефнень сяськондезь марняса.

И сась Марфань вастс ёфеи од цераня, тя ульсь Степан, кона каесь аляфтома-тяд яфтома и эрясь Нина Алексеевнатнень маласа. Сон нинге ёмланяста ашезе сода ласкандамать, ашель ужельдиец, ашель и сюциецка. Сонь, кода шумбратаза церанянь, кучеезь инь стака тефненди : и лядема, и скирдовандама и Нинать тракторонцты пакеяв пенгань ускома. Кунара ни сонь седиенц салазе тракторонь увфось, или, пади, Нинась, кона ульсь азор тя машинать лангса. Соду шама шабра стирнясь, Нина Кабакова, тейнза няевсь волшебницакс. Сясь, мзярда мярысть озамс Марфа Николаевнань вастс, сон ульсь ни анок тянь тиемс. Васенце шиста нинге, работама Степанонь мархта, Нина Алексеевна шарьхкодсь, что тевоц сяда теждялгодсь. Степан старандась тиендемс сембе стакать, ужяльдсь Нинань эса, кода маштсь. Марса работамасна ашезь ёта тяфтак : пин-гонь ётазь шарьхкодсть, что фкя-фкафтома тейст аф улемс. И синь рьвяясть. Нина Алексеевна кармась учема шаба. Эста и максозе тракторонц Степанонди. Сон надиясь и верондась тейнза, сон лац содазе, что Степаноц тракторть кельгсы и ванфтсы тяфта жа, кода тянь тиендезе сон.

Кельгома стирнянц, а меле рьванц ваксса работазь афи марявсь, кода ётась пингсь.

Аделавсь войнась. Кармасть сашендома алятне, но аф сембе, ламотненди изь учев сяськомань шись. Кие эздост ульсь кядьфтома, кие пильгфтома, кие сельмофтома. А Нина Алексеевна кода работась, стане и работай. Но сембе сяка оттне ульсть павазуфт. Эрямаль да эрямаль, но сась пинге Степанонди тумс армияв служама. Стака ульсь явомасна, но вдь синь шарьхкодсть, аф сембе пингс. Тумстонза ктмордазе рьванц, палазе и энельдсь : «Учемак, Нина, мон саян, лия вдь учизе монь аш. Мрдан, карматама эряма сада лац, вдь мон туян аф войнав». И Нина Алексеевна учcь. Сон учcь ни аф ськамонза, а емла Володянянц мархта. Церанянц мархта учемась ульсь сяда теждя. Сась Степаноц армияста. Нина Алексеевнань эряфоц теждялгодсь. Курок шачсь стирнясна, конанди макссть Валяня лем. Тя Валянясь, Валентина Степановна, кота кизот ни работай Жуку велесонк велень Оцюнякс, сяда меле тага шачеть кафта церасна и кафта стирнясна. Кота итть шачфтсть и касфтсть. Степан фалу корхнесь : «Стирнятне тонь кядень лезкене, а цёранятне монь». Тяфта и лиесь. Кеподсть шабатне, Нина

Алексеевна кармась работама колхозса дояркакс. Группасонза ульсь колмогемонь кафта траке. Эрявсть эрь шиня потнемс кафкеть, а койконатнень колмоксть, а потнесть эста нинге кядьса. Нина Алексеевнанди лезнесть стирнянза : Валясь, Розась и Лидась. Мяляфтсы Нина Алексеевна, когда эряскоткшнесть пачкодемс фермав тядяснон инголе, штоба потямс ся тракснень, конат макссесть сяда ламонь лофца, А меле фкяфкянди азондсть и фалендакшнесть, кие потясь сада лама. Сембось семьяса ульсь кода эряви, но горясь сась и синь ширезост. Войнафтома, мирнай пигнета, 1973 кизоня шавовсь оцю цёрасна Володя. Бта эряфське лоткась, шиське изь эжде. И мезе тядять мархта улель сяда тов, кда вакссонза афоль уле кельгома мирдец Степан ? Сон лездсь тейнза лия сельмоса варжакстомс эряфть лангс, сяка тев лятфнесь лядыкс шабаснон колга. А стирнятне ашезь кадонда траксонзон апак потяк. Кда фермаса кирневсть, эсь траксснон потнезе Миша цёрасна.

Вов кодама итть касфтсь Нина Алексеевна и Степан Трофимович. Дояркакс работась кафкса кизот и нинге кафта кизот ульсь фермаса заведующайкс.

Ведьгемонь ниле киза эрясть марса, ведьгемонь ниле киза кельгозь мольсть эряфонь киге

Нина Алексеевна и Степан Трофимович. Но вов ни колма кизот аш шиса Степан. Аньцек пара валса лятфни Нина Алексеевна сонь колганза : «Кда ульсь тейне кельме, сон макссесь лямбоня, кда пси, уфсесь кельмоня, кда ерхкеень прама сталмотнень эзда, венепнезе кяденц. Степанозе тейне сембе кизотнень ульсь кемодонга кеме няжадема вастокс. Вдь тумаль тейнек марняса эряфета, но тянь аф тейнек арьсемс, тянь, кода мярьги Шкайнясь. Вдь тяни тейнек аньцек эрямаль и кеняртькшнемаль. Шабаньке аф юкснесамазь, эряйхть аф кальдявста. Кемголмува унокозе, ниле уноконь унокта. Овоневок занцихть оцю вастт : фкясь школань директор, омбоцесь райононь Оцюня, колмоцесь предприниматель.

1977 кизоня Нина Алексеевнанди топодсь 50 киза, тусь ваймама. Но сембе сяка сон пингонц аф юмафнесы тяфтак.

Кельгозе нинге одняста Нина Алексеевна якаманц мокшень панарса, но, работамок трактористкакс, сидеста тя изь удалее. Но вдь сонь кассть колма стирнянза, сяс фалу арьсесь анокламс тейст мокшень панархт : ашкоркст, гайтятт, крганьберьфт. Сон корхтай : «Эстейне изь сав нльне оцю праздникста наряжакснемс мазыста, а стирнятнень аф сельмотьфтьсайне. Тисайне анокласайне сембонь, мезе вети мокшень наряжамбяльсь». И сон тись сембонди. Мезе тият, кда сон тяфтама ломанць. тейнза ни 78 киза, но сонь пялевешкас палы толоц, а нголенза сратфт разнай тюсонь ажнанянза, и конясонза сельмованоманза. Нина Алексеевна эряскады нинге уноконь уноконди кадомс эсь колганза лятфнембяль.

Пяк интереснайста аделавсь васедеманьке. Сонь аделазе азоравась, Нина Алексеевна. А азсь вов мезе : «Кда содалине, што коса-коса ащи монь тракторозе или сонь кондяма пачфтелине прязень малазонза, пштеделень эзонза и палселине, палселине. Мон сонь кельгине, кода мезеньбди живойнь».

Н. Кинякина,
Жуку велень средняй школань учительница.

1 окт 2005

На первую страницу

На страницу Из века в век

Сайт SovetOK отличный источник познавательных материалов для кулинаров.