Мордовский фольклор

Пяштень Тараткя — Ореховая Веточка
(народная сказка на мокша-мордовском-языке)

Эрясь фкя велеса аля. Сон ульсь аф пяк беднай, аф пяк козя. Эрясь сон ветененза : синць атят-абат да колма стирьсна. Весть праздник малав срхкась атясь базару и кизефнесыне стирензон :

— Мезе, азость, тейнть рамамс праздниконди ?

Кафттне ульсть пяк жаднайхть нарядс, кельгозь наряжакшнемаснон да фалу емла сазорняснон рахсекшнезь, кона ефси афоль вана наряд лангс. Мезец ули — сянь щасы, мезе рамайхть — ся мархта сон довольнай. Кизефтезень алясь, мезе тейст рамамс. Оцюсь корхтай :

— Тейне рамак парьхциень мазы руця, кувака сюролда мархта, марнек панчфонь.

Омбоцесь корхтай :
 
— Рамак тейне валда сенем парьхциень платья, эсонза улест мази емла панчфкат.

Мольсь алясь колмоцети, кизефнесы :

— Мезе, стирняй, тейть рамамс ? — Сон пяк кельголезе емла стиренц.

— Мезевок, — корхтай стирнясь, — тейне аф эряви, а мзярда етат вирьге, тоста сясть тейне пяштень тараткя.

— Пяштень тараткять мархта месендят ? — корхтай аляц. — Тон ина мярьк ладом, мезе тейть рамамс ?
 
— Мезевок аф эряви, кантт мондейне пяштень тараткя.

Тусь атясь базару. Рамась тоста кафта стирензонды казнет и моли ни куду. Пачкодсь вирь малас. Лядьсь мялезонза, мезе тейнза наказакшнесь емла стирец. Сувась кить эзда вирь кучкав, мусь цебярь пяштелкс да синдсь эздонза цебярь тарад, емла лопаня мархта. Аньцек ерась атясь тумс, коста-бди лиссь да кядьта кундазе оцю офта. Корхтай офтсь :

— Мезенди тон токсесайть монь владениянень ? Тяни, кда пачкодят куду, эстокиге уск тя вастти емла стирцень.

Алясь эводсь.

— Ков, — корхтай, — мон максса кельгома сирезень, да и конанцка аф максса !

— Архт, саты корхтамс, — мярьги офтсь. — Ванды уск емла стицень. Аф усксак — калльдяв ули эстейть.

Тусь алясь куду аф веселайста. Сась куду. Кафта стиренза ласькозь каршезонза ласькихть, мезе сон тейст рамась, кизефнихть. Сувась алясь куду, таргазень рамаф казнетнень кафта оцю стирензонды, а сонць ризназь ащи, киньге лангс аф ваны. Сявозь казнетнень, наряжакшнихть, дивандакшнихть, молихть сазорснон ваксс, фалендакшнихть. А емлась ащи да учи, усксь тейнза аляц мезевок или аш. Лиссь сонга ингольдень куду. Ваны алянц сельмос, сяльде кизефтезе :
 
- Ускоть, аляй, мондейне, мезе наказакшнень, или аш ?

А аляц ащихть ни аванц мархта кафонест и горявакшнихть.

— Ускомс усконь, — уставась атясь, — да оцю беда тиень тя ускомать мархта. Мзярда сязине, офта кундамань да нолдамань тфтама уговор мархта, што мон ванды тонь ускте тейнза оцю вири. Али аф ускте ? Молян тага монць, катк месендьсамань.

Сявозе емла стирец пяштень тараткять и корхтай :

— Ну, аляй-авай, тяда горява, кли тянди улемс, ковга аф туят. Давайте ускомасть, мезе ули, ся и ули.

Аш месендемс. Кильдезе алашанц атясь, озафтозе емла стиренц да ускозе оцю вири, тона вастти, коста синдезе сон тараткять. Аньцек пачкодсть пяштерьксь ваксс, офтсь ни учси эсост.

— Мес пяк ламос ? — корхтай офтсь. — Мон ни ерань веть монць молемс. Ну, тяни, атя, пращак стирцень мархта да арх, мекиге тят вванонда.

Палазе атясь стиренц, шарфтозе алашанц да тусь авардезь вирь пачк.

Аньцек кенерсь атясь тумс, офтсь сувафтозе стирть кодамабди утомс. Тоста сон мусь кенкш. Панжезе кенкшть да сувафтозе стирть алдоньхоромас. Ащи тоса доец, дворецса всякай богатства : комнататне валтт, стентне хрусталень. Сувасть фкя кенкшкава, тусь офтсь, омба кенкшкава прважазе стирть. Катикинди пшкядсь сонь наряжамда. Сувась стирсь комнатас, тосашрать лангса сембе анокт. Нинге сон аф няйсы, аньцек марясы, кати-кие эсонза кошарды наряжамдонза. Путфт шрать лангс всякай добра, пец аш: улихть тоса стафт золотаса, ульсть тоса простойнят. Сон щась простой платьяня, карксазе серай каркскаса, сотсь прязонза акша граусонь руцяня, и сонь лихтезь залу. Залса шра песа ащи цебярь од цера, учи эсонза. Шрать лангса всякай пища, винат, мезе повсь. Озафтозе церась ваксозонза, корхтай :

— Тон монь эздон тят пеле, мон аф токате. Мон од церан, аф офтан. Учт малость. Врема сай. Мин дворецоньке лиси лангу, да карматама эряма мастор лангса, а тяни пока тямак кизефне, мес тейнек эряви тяфта эрямс.

Тусь эрямасна эсь кигаванза. Шобдава стяйхть, илять мадыхть. Эрясть тяфта целай киза. Кажнай недяляня няенкшнесь стирсь , кода офтсь кайсезе офтонь понав кеденц и арсесь меки ломанькс, и, меколнакт, коста вирьге шарома срхкай, меки офтокс арай. "Мес сон, — думандай стирсь, — тяфта тиенди, мезенди щасы офтонь понав кедть"? Весть стирсь учезе, мзярда офтсь каязе понав кедть, сон салава сувась комнатазонза, салазе кедть да пянакуду каязе. Кесь палсь тоса. Етась ши. Кармась церась кати-ков срхкама. Сувась комнатазонза, ваны, аш косовок офтонь понав кедсь. Ванць, ванць — аш. Кзефнесы стирть :

— Коса тяса ульсь монь офтонь кедезе ?

— Мон плхтайне, — азонды стирсь.

— Тон тиеть оцю беда, — корхтай тейнза церась. — Стама беда, конань мезьсовок аф петьсак. Мон улень колдубаф фкя колдунонь эзда. Сон монь колдубамань ся пингс, мзярда мон кельгован кодамовок стиренди, и эрямс тя стирть мархта мода потмонь царстваса целай колма кизот. Минь ни мархтот эряме кафта кизот да тяла, иляткшнесь аф лама, аньцек пяле киза. Тон плхтайтьмонь офтонь кедезень аф времастонза, тяни аф содаса, мезе мархтонк вандыс тиеви.

Лажнай церась, стирське аварди.

— Мес тон ашить азонда тянь тейне сяда инголи ? Мон ерайхтень тяфта тиемс ломанькс, штоба тумс мастор лангс эряма.

Шоподсь шись. Ваны стирсь, куду сувасьлиезь колма вирь мацихть. Вирь мацихне таргасть эсь пацястост кувака толгат, ердазь мастору толгатнень, синць лиссть лиезь кудста. Ваны стирсь, арась цераське мацикс да мельгаст лиссь. Илядсь стирсь мода потмонь царствав ськамонза. Шити аф весть аварди. Стане эряй. Весть марясы, пялеветь кенкшкава сувась акша маци сонь комнатазонза да корхтай :

— Тон тят аварькшне, красавица. Тонь эсь эздот лиссь бедась, а мон тяни эрян колдунть ширеса, паксянзон лангста сукскат кочксян — нянь мархта пеке андн. Кеподить масторста мациень колматолгатнень, сявить мархтот да архт вешендема ся колдунть, конань пяле мон эрян. Кда сонь мусак, пря няфтть тейнза, сонь церанц мяльс туят. Церась кармай тонь сявомот рьвакс. Тон озак шра пезонза, вешть эстейть лаказь лакай ведь. Ся ведти нолдайть ня колма толгатнень, да мзярда кармайхть вина каннема, ся веднять эзда каяк путькскя колдунть рюмкас, колунть рьванц да церанц рюмкас. А мон тейть кандан толга. Сянь ванды синнезь синнек, сон вирьса арай алашакс, ведьса арай корабякс, тонь колдунть шири пачфттянза. Ну, тят аварькшне; прощай. Тят юкста, мезе мярьгонь, тиемс.
 
Азондозень нянь, да сонць юмась.

Шобдава стясь стирсь, кочказень толгатнень, лиссь ушу. Синдерезе фкя исяконь максф толгать — появаськильтьф тройка, сембе рысакт. Озась, тусь ардозь. Илядьс пачкодсь моря берякс, алашатне арасть кораблякс. Пачкодсь сон тона беряку. Ваны, колдунонь дворец берякть ваксса. Сон озась беряконя-ти, няйсы, сай од цера. Колдунть мяльс стирсь тусь, да колма шида меле тисть свадьба. Каясь стирсь синь рюмказост, кода тейнза мацись мярьгсь, толгань ведня. Сразу арась колдунць семьянек мацикс, а сембе мацихне од церакс. Ваны стирсь, пеедезь сувай соньге церац - офтсь. Кундазь синь ня мацихнень, шавозь да калмазь. А ня колма цератне тусть куду. А стирсь церать марзта венцясть. Строясть дворец эстейст, стирть алянцы да кармасть эряма. Тянивок жифт и здорофт.

Мордовский фольклор

На первую страницу